Rom 16 | BEF | STEP | Lenali kehelilo. A'i mone, gi'a Fibi yabe luse a'i ai Senikilia hepatoga minoto Kilisitohi naga'amofihi lili'na lito enehe'molata a'uba lenalitoga nehetilenogo lalalutifihi suhi huto be tigilo. Sipi Bomofihi gi'amu'i be tigite Hu'mamofihi bona'magita le'melata suhi hite ya hilo. Ai boana'i babu luto enehe'moto to nani hiti nehe'mo'ehina yana'mu hetofa lalalutifu nohigo he'mete le'malo.

Romans 16

Polu lalu'afu kaga lu epi'ehina

1 Lenali kehelilo. A'i mone, gi'a Fibi yabe luse a'i ai Senikilia hepatoga minoto Kilisitohi naga'amofihi lili'na lito enehe'molata a'uba lenalitoga nehetilenogo lalalutifihi suhi huto be tigilo. Sipi Bomofihi gi'amu'i be tigite Hu'mamofihi bona'magita le'melata suhi hite ya hilo. Ai boana'i babu luto enehe'moto to nani hiti nehe'mo'ehina yana'mu hetofa lalalutifu nohigo he'mete le'malo.

3 To alobole loemo Akuilagi to Pilisikagi neha'ifihe luto koyonamo lu etimilo. Etali hiti Yesu Kilisitohi lili'na moneka li'ohuta yabe. 4 Koyapa'i bona'magi nahalana kanagu etali etugufa kaba mehise nehe'me'aha'ina yabe. Ya hi'aha'inaya nani nofokehi lito nanigo etali kumu ya liluna meni'ibe. Asaga Kilisitohi naga'magi etali kumu enofokehi lilata nehana yabe. 5 To etali noha'atitigu Kilisitohi naga'magi li nupa hilata nehana, nehafihe luto ya lu epilo.

To nalalu'nifu sipi nebesise bo, Epanetusi nohapihe luto nolunagi lu emilo. Asaga Esia melugu bona'magi Kilisitohi keheli ule'ale huto nehana, ai kohe toto Kilisitohi kehelito yata'a huto hu'ehina bo yabe. 6 To a'i mone gi'a Malia, nohapihe luto li emi netalo. Ai gobi hana lili'na lenali kumu li'ehina yabe. 7 To nalalu'nile'i Yuta bo Atolonikusigi to Yuniasigi, etali nani hiti kalabusigu mino'ohuta bole neha'ifiye li etimilo. Yata'a nanimo fa'mene nohugo etali kohe tete Kilisitohi naga'i lolo hite mine'aha'ina yagi asaga aposolo bona'magi etali kumu keheligo noenebesibe.

8 To nalalu'nifu nonebesina bo Apiliatusi nohapihe luto nolube. Ai hiti nani hiti Sipi Boti kumu bati huto koguna ito nomino'ibe. 9 To Ubanu nohapihe luto lu emilo. Ai to nani hiti Kilisitohi lili'na monekoto li'ohu'ina yabe. To Satakisi, laga'ni nonebesina bo nohigo nohapihe luto lu emilo. 10 To Apelesi nohapihe luto nolube. Ai Kilisito kumu ule'ale huto lusi bo nohina'mu asaga bona'magi akeheli'ahabe. To Alisotobuluhi noha'agu neminana bona'i nehafihe luto lu epilo. 11 To Helotioni nohapihe luto lu emilo. Ai nani suhi luto Yuta nagalugu nohibe. To Nasisuhi noha'agu Kilisitohi naga'magihi nehafihe luto lu epilo.

12 To loe bole Tilifane hiti to Tilifosa hiti Sipi Bomofihi lili'na neli'inaya neha'ifiye luto nolube. To Pesisa, ai lusina nebesina bo nohigo nohapihe luto lu emilo. Ai gobi hago Sipi Bomofihi lili'na babu luto li'ehina yabe. 13 To Lufusi nohapihe luto nolube. Ai Sipi Bomofihi lili'na li bati bati huto lilata bo nohibe. To ai'a ito'afu ana huto nohapihe luto ya lu etimilo. Ai ito'nifi tegi huto nohina a'i yabe. 14 To Asinikilitumo Felegoniumo Hemesiumo to Patolobasiumo Hemasiumo to lenali Kilisito kumu nogonamu tamu'ni lolo hi'ahana bona'i asaga'i bati hite nehafihe luto nolube. 15 To Filologusigi Yuliagi alobole neha'ifihe luto to Neleusigi to etali'afihi neha'ifihe luto nolube. To Olipasi hiti to Hu'mamofihi naga'i lenalitoga neminana boana'i bati hite nehafihe luto nolube.

16 Lenali asaga'na ai soso hu etago ai soso hu etago hite Yesu Kilisito kumu moneko'na hiti minalo. To asaga Kilisitohi naga'i fato fato hepatoga nehanamagi lenali kumu laga'ani neepesigo nehafihe lite nelago ya'ma fayahi nani nokoyobe.

Poluhi kaga'a asu halibe.

17 Nalalu'nigitabe, lenegekesa lito'ni lu nolepube. Bona'i mone'amagi Yesuhi naga'a loko hilune'mu to keheli ule'ale hise'namu li sibina nehanamofihi kaba hu bati hilo. Nani kaga lepi'ohunanamofihi le'mo sibi saba hilata to hetofa mono kaga keheli he'milata nehana yabe. Lenemegesa hi epilo. 18 Enali ya hise bona'magi Sipi Boti Kilisitohi lili'na menelibe. Enali enugufa'ani laga enebesise'namofihi mege'i nemalabe. To enali legeso hite laga hina ka mi'mi hi'ahana ka lilenogo lenalitoga mone keheli bati mehilana bona'magi laga hina ka nelabe lite mege'i melelata nehabe. Lenali kaba hu bati hilo. 19 To lenali ka lamana'amofihi keheli ule'ale hite amuya melete mege'i nemalana asaga boana'i keheli su he'ahabe. Yana'mu lenali keheli sibina mehise nehago nofokehi nolube. To lenali hetofa hapa'amofihi keheli bati hite mege'i malago bati huto yabe. Ya hilata nasana nebesibe. To foipa hapa'amofihi mekeheli'ehilo. 20 To hupa mone kana bulenogo Hu'mau komopatigu fuluna'a limi'ehina bouba ma'asi lenele'moto lenigigusatu Satahi iti kalana'mu yabe.

To Sipi Boti Yesu lehe'mose'na'a lenalitoga minalibe luto nunumu nohube.

21 To nani hiti moneka lili'na nolu'ina bouba, Timotiu, lenali nehafiye luto noligo nani nokoyobe. To nalalu'nigi Yuta bona'magi enigi'ani Lusiugi Yesonigi Sosipatagi ana hite nehafiye lite nelago nokoyobe.

22 Nani Tetiasita, Poluhi baga'aguti kaga ma noligo fayahi koyolata bo Sipi Boti'mu yabe luto lenebe notugube.

23 To nalalu'nifu, Gaiyasiu nehafihe luto nolibe. Ai'a noha'agu Kilisitohi naga'i mone'amagi li nupa hilata nehana. To Elasatu gamanimofihi efahi kaba bo, to gonamu tamu bo mone Kuotasi hiti lenali kumu nehafihe lite nela'ibe.

24 Sipi Boti Yesu Kilisitou lenehe'mose'na lenalitoga minalibe. Ma'naka.

Lali Sipi Bomofihi gi'a liyafa hilune

25 Lali Hu'mamofihi gi'a liyafa hilune luto nolube. Ai kehelise'natini le'mo amuya hinogo lenali loe lae mehise aitoga ule'ale hite minalabe. Yesu Kilisito kumu ka lamana'a nani lepi'ohunana ya ni'ibe. To ana huto Hu'mau koyapa kanagu suguna ka mone emasana fala ki'ehinamofihi yatai Sipi Botiuba hepa'i kugumato li huto hu'ehina ka ya'ma lu hokolo hu lepolo'ehina yabe. 26 Ya'ma kaga koyapa fala kito mino'ehinaya, yalo lu huto huto bomagi ana kaga fayahi keyete yanauba li hokolo hu'ehigo akeheli'ohune. Yatai huse mehuse suhi nohina bo, Hu'mau lu epilo luto lu molo'ehinamofihi lali noto noto bona'magi asaga'i lu epilata nohune. Ya lu epito nohunogo enali asaga bona'magi ana kaga kehelite aitoga agoya hu emite mege'i malalabe.

27 Hu'mau ai'asigo Sipi Bo nohibe. Ai'asigo keheli bati huse bo nohinagi yege filo. To Yesu Kilisito kumu yabe luto sipi lenegelo bite gi'a liyafa hinogo hofa teno. Ma'naka.